အ၀လွန်ခြင်းကို ဘယ်လိုသိနိုင်လဲ
သာမာန်ထက် ၀နေလား (သို့) အ၀လွန်နေလား သိချင်ရင် ကိုယ်အလေးချိန် နှင့် အရပ်ကို နှိုင်းယှဉ်တိုင်းတာမှု ဖြစ်သည့် BMI တွက်ကြည့်ပြီး သိနိုင်ပါတယ်။
BMI = ကိုယ်အလေးချိန် (kg) / (အရပ်အမြင့်(m) x အရပ်အမြင့် (m))
BMI 25 ထက်များနေတဲ့ သူကို သာမာန်ထက် ကိုယ်အလေးချိန် နည်းနည်းများသူ
BMI 30 နှင့် အထက်ကို ၀နေသောသူ
BMI 40 နှင့် အထက်ကို အ၀လွန်သူများ ဟု သတ်မှတ်နိုင်ပါတယ်။
အဝလွန်ရခြင်း အကြောင်းအရင်း
အဝလွန်ခြင်းဆိုတာ ခန္ဓာကိုယ်ထဲမှာ အဆီပမာဏ အလွန်အကျွံ ရှိနေခြင်းပဲ ဖြစ်ပါတယ်။ သဘာ၀အလျှောက် လောင်ကျွမ်းနိုင်သော ကယ်လိုရီပမာဏထက် ပိုမို စားသုံးမိသောအခါ ခန္ဓာကိုယ်ထဲမှာ အဆီပိုတွေ စုလာပြီး အဝလွန်ခြင်း ဖြစ်လာတာပါ။
ကျန်းမာရေးနဲ့ မညီညွတ်သော အစားအသောက်များစားခြင်း - ကယ်လိုရီများသော အစားအစာများ၊ သစ်သီးများနှင့် ဟင်းသီးဟင်းရွက်များ ချို့တဲ့ခြင်း၊ အသင့်စား အစားအစာများနှင့် ပမာဏများသော အစားအစာများကို အလွန်အကျွံ စားသုံးခြင်းက ကိုယ်အလေးချိန်ကို တိုးစေပါတယ်။
အဖျော်ယမကာများ အလွန်သောက်ခြင်း - အထူးသဖြင့် အရက်မှ ကယ်လိုရီများစွာ ရနိုင်ပါတယ်။ သကြားပါသော အချိုရည်များကို နေ့စဉ်ဓူ၀ သောက်သုံးနေပါကလည်း သိသိသာသာ ကိုယ်အလေးချိန် တက်လာနိုင်သည်။
မလှုပ်မရှားနေခြင်း - ကွန်ပျူတာ၊ ဖုန်း၊ တီဗီ ကြည့်ခြင်း နှင့် ဂိမ်းများ တစ်ချိန်လုံး ဆော့ခြင်းသည် အထိုင်များပြီး လှုပ်ရှားမှုမရှိတဲ့ အတွက်ကြောင့် ကယ်လိုရီက လောင်ကျွမ်းသင့်သလောက် မလောင်ကျွမ်းဘဲ အဆီပိုတွေ စုလာနိုင်ပါတယ်။
အခြားသော အကြောင်းအရာများ
အိပ်ချိန်လုံလောက်စွာမရခြင်း (သို့) အလွန်အကျွံအိပ်စက်ခြင်းတို့ကလည်း အစာစားချင်စိတ်ကိုတိုးစေပါတယ်။ ကိုယ်အလေးချိန်တက်စေတဲ့ ကယ်လိုရီနဲ့ ကာဗိုဟိုက်ဒရိတ် များသော ချိုတဲ့ အစားအစာတွေကို ပို၍ တောင့်တနိုင်ပါတယ်။ ထို့အပြင် လူတွေဟာ စိတ်ဖိစီးမှုများတဲ့အခါ ကယ်လိုရီမြင့်တဲ့ အစားအစာတွေကို ပိုရှာလေ့ရှိတဲ့ အတွက်ကြောင့် စိတ်ဖိစီးမှုကလည်း အ၀လွန်ခြင်းကို ဖြစ်စေနိုင်ပါတယ်။
တစ်ချို့သော ကျန်းမာရေးပြဿနာများကြောင့်လည်း ဖြစ်နိုင်ပါတယ်။
အမျိုးအစား 2 ဆီးချိုရောဂါ
နှလုံးသွေးကြောကျဉ်းရောဂါ
ရင်သားကင်ဆာနှင့် အူမကြီးကင်ဆာကဲ့သို့သော အချို့သော ကင်ဆာအမျိုးအစားများ
လေဖြတ်ခြင်း
ဟိုက်ပို သိုင်းရွိုက်လို့ခေါ်တဲ့ သိုင်းရွိုက်ဂလင်းခြင်း စတဲ့ ရောဂါများကြောင့်လည်း အ၀လွန်ခြင်း ဖြစ်လာနိုင်ပါတယ်။
အဝလွန်ခြင်းကို ကုသခြင်း
အဝလွန်ခြင်းကို ကုသရန် အကောင်းဆုံးနည်းလမ်းကတော့ ကျန်းမာရေးနှင့် ညီညွတ်သော ကယ်လိုရီနည်းတဲ့ အစားအစာများ စားခြင်းနှင့် လေ့ကျင့်ခန်း ပုံမှန်လုပ်ပေးခြင်းတို့ပဲ ဖြစ်ပါတယ်။
အာဟာရပညာရှင်မှ အကြံပြုထားသည့်အတိုင်း တစ်နေ့လိုအပ်သလောက်ပဲ ကယ်လိုရီကို တွက်ပြီး စားပေးပါ။ ပိုမစားမိစေပါနဲ့။
ကိုယ်အလေးချိန် လျှော့စေတဲ့ လေ့ကျင့်ခန်းကို ပုံမှန် လုပ်ပေးပါ။
လမ်းလျှောက်ခြင်း၊ ရွရွပြေးခြင်း၊ ရေကူးခြင်း တို့လို နေ့စဉ်လှုပ်ရှားမှု ပြုလုပ်ပါ။
အစာစားလျှင် ဖြည်းဖြည်းစားပါ။ အချိန်ပုံမှန်စားပါ။ ဗိုက်အရမ်းဆာမှ စားလျှင် အလွန်အကျွံစားနိုင်သောကြောင့် အထူးသတိထားပါ။
အချိန်တိုင်း အစာစားချင်စိတ်ကို ပြောင်းလဲဖို့အတွက် အာဟာရပညာရှင်တစ်ဦးထံမှ စိတ်ပိုင်းဆိုင်ရာ ပံ့ပိုးကူညီမှု ရရှိခြင်းသည်လည်း အကျိုးရှိနိုင်ပါတယ်။
အကယ်၍ လူနေမှုပုံစံပြောင်းလဲခြင်းက သင့်ကိုယ်အလေးချိန်ကို မကျစေဘူးဆိုရင် Orlistat လိုမျိုး အဆီကျဆေးများလည်း သောက်သုံးလို့ရပါတယ်။ ထိုဆေးကို မှန်ကန်စွာသောက်သုံးပါက အဆီပိုတွေကို လျှော့ချပေးနိုင်ပါတယ်။ အာဟာရပညာရှင်ဖြင့် orlistat သည် သင့်အတွက် သင့်လျော်မှု ရှိ မရှိကို တိုင်ပင်ဆွေးနွေးဖို့တော့ လိုပါတယ်။
အဝလွန်ခြင်းကြောင့် ဖြစ်နိုင်သော ဆိုးကျိုးများ
အဝလွန်ခြင်းဟာ နေ့စဉ်လုပ်ငန်းဆောင်တာများကို အနှောက်အယှက်ဖြစ်စေတဲ့အပြင် ပြင်းထန်သော နောက်ဆက်တွဲ ကျန်းမာရေး ပြဿနာများစွာကိုလည်း ဖြစ်စေနိုင်ပါတယ်။
အသက်ရှူမဝခြင်း
ချွေးထွက်များလာခြင်း
အိပ်ရင် ဟောက်ခြင်း
ကိုယ်လက်လှုပ်ရှားမှုလုပ်ရန် ခက်ခဲခြင်း
အရမ်းပင်ပန်းနေတတ်ခြင်း
ခါးနှင့် အဆစ်နာတတ်ခြင်း
မိမိကိုယ်ကို ယုံကြည်မှု နည်းပါးခြင်း
အထီးကျန် ဖြစ်နေတတ်ခြင်း
အဝလွန်ခြင်းကြောင့် စိတ်ဓာတ်ကျခြင်းနှင့် မိမိကိုယ်ကို ယုံကြည်မှုအားနည်းစေခြင်း စတဲ့ စိတ်ပိုင်းဆိုင်ရာ ပြဿနာများလည်း ဖြစ်နိုင်ပါတယ်။ ထိုပြဿနာများကြောင့် မိသားစု၊ သူငယ်ချင်းများနှင့် ဆက်ဆံရေးကို ထိခိုက်စေနိုင်ပြီး စိတ်ဓာတ်ကျခြင်းအထိ ဖြစ်စေနိုင်ပါတယ်။
ပြင်းထန်သော နောက်ဆက်တွဲ ကျန်းမာရေး ပြဿနာများ
အဝလွန်ခြင်းဟာ ပြင်းထန်သော ရောဂါများကိုလည်း ဖြစ်လာနိုင်ပါတယ်။
ဆီးချို၊ သွေးတိုးရောဂါ
နှလုံးသွေးကြောကျဉ်းခြင်းနှင့် လေဖြတ်ခြင်း
ပန်းနာ ရင်ကျပ်ရောဂါ
အူမကြီးကင်ဆာ၊ ရင်သားကင်ဆာနှင့် သားအိမ်ကင်ဆာအပါအဝင် ကင်ဆာအမျိုးအစားပေါင်းများစွာ
စားချဉ်ပြန်ရောဂါ (ရင်ပူတတ်ခြင်း)
သည်းခြေကျောက်တည်ခြင်း
ကလေးမွေးဖွားနိုင်မှု လျှော့နည်းခြင်း
အဆစ်များနာကျင်ခြင်း
နေ့ခင်းဘက်တွင် အိပ်ငိုက်ခြင်း နှင့် ကားမောင်းနေစဉ် ယာဉ်မတော်တဆ ဖြစ်နိုင်မှု မြင့်မားခြင်း
အသည်း နှင့် ကျောက်ကပ်ရောဂါ
ကိုယ်ဝန်ဆောင် ဆီးချိုနှင့် အခြားသော ကိုယ်ဝန်ပြဿနာများ
သင်ဘယ်လောက် အ၀လွန်နေလည်းပေါ် မူတည်၍ ပျမ်းမျှသက်တမ်း (၃) နှစ်မှ (၁၀) နှစ်အထိပဲ အသက်ရှင်နိုင်ပါတယ်။
ဥရောပတွင် အ၀လွန်နေသော (၁၃) ဦးတိုင်းတွင် အနည်းဆုံး (၁) ဦး အသက်ဆုံးရှုံးနေပါသည်။
ထို့ကြောင့် အ၀လွန်ခြင်းကို ကာကွယ်ရန်နှင့် ကုသရန် My-Medicine မှ အာဟာရပညာရှင်နှင့် တိုင်ပင်ဆွေးနွေးလိုလျှင်တော့ ဤလင့်ခ်ကို နှိပ်၍ www.mymedicine.com.mm ဆေးကုသမှု ခံယူနိုင်ပါပြီ။ ထို့အပြင် ဖုန်းနံပါတ် 09-980-635-588 ကို ဆက်သွယ်ပြီး တိုင်ပင်ဆွေးနွေးနိုင်သလို ကျန်းမာရေးအတွက် လိုအပ်သော ဆေးဝါးများ မှာယူလို့လည်း ရပါသည်။ တစ်နိုင်ငံလုံး အိမ်အရောက်ပို့ ဝန်ဆောင်မှုဖြင့် ပို့ဆောင်ပေးနေပါပြီ။
ဆေးဝါးများကြောင့်လည်း အ၀လွန်နိုင်ပါတယ်။ ဥပမာ - ဆီးချိုဆေး၊ စတီးရွိုက်ဆေးများ သောက်နေရတဲ့ သူတွေ
ထို့အပြင် အဆစ်ရောင်ရောဂါ ရှိသူတွေဆိုရင်လည်း လှုပ်ရှားဖို့ခက်တာ၊ နာကျင်တာတွေကြောင့် ကိုယ်အလေးချိန်တက်ဖို့ အလားအလာများတတ်ပါတယ်။