အိပ်ချင်ရင်တော့ အလွယ်တကူ အိပ်ပျော်သွားပေမယ့် မနက် (၃)နာရီ (၄)နာရီ လောက်မှာ ပြန်နိုးလာပြီး တော်တော်နဲ့ ပြန်အိပ်မရခြင်းမျိုး ဖြစ်နေပါသလား။ တစ်ခါတစ်လေ ဖြစ်တတ်တာက စိုးရိမ်စရာတော့ မရှိပေမယ့် နေ့စဉ်ရက်ဆက် ဖြစ်နေရင်တော့ တစ်ရေးနိုး အိပ်မပျော်တဲ့ရောဂါ (Maintenance insomnia) ဖြစ်နိုင်ပြီး ဆရာဝန်နှင့် တိုင်ပင်ဖို့ လိုအပ်ပါတယ်။
ဘာကြောင့် ဖြစ်ရတာလဲ
အလုပ်၊ ကျောင်း၊ ငွေကြေး၊ မိသားစုနှင့်ပတ်သက်သော စိတ်ဖိစီးမှုများ၊ ချစ်ခင်ရသူတစ်ဦးသေဆုံးခြင်း၊ ဖျားနာခြင်း၊ ကွာရှင်းပြတ်စဲခြင်း၊ အလုပ်ဆုံးရှုံးခြင်း စတဲ့ စိတ်ဒဏ်ရာများကြောင့် ညဘက်နိုးလာပြီး တော်တော်နဲ့ ပြန်အိပ်မရတာ ဖြစ်နိုင်ပါတယ်။ အကယ်၍ ထိုကဲ့သို့ စိတ်ပိုင်းဆိုင်ရာ ပြဿနာများ မရှိပါက
စိတ်ဓာတ်ကျခြင်း
သွေးဆုံးခြင်း သို့မဟုတ် ဓမ္မတာလာခြင်းကြောင့် ဟော်မုန်းအတက်အကျများခြင်း
အစာမကြေခြင်း၊ စားချင်ပြန်ခြင်း နှင့် အခြားသော အစာအိမ်နှင့် အူလမ်းကြောင်းဆိုင်ရာ ပြဿနာများ
သွေးတွင်းသကြားဓာတ်နည်းခြင်း စတဲ့ ဆေးဘက်ဆိုင်ရာ ကျန်းမာရေးပြဿနာများ ကြောင့်လည်း ဖြစ်နိုင်ပါတယ်။
အိပ်ရာမဝင်ခင် ပြုလုပ်သင့်သည့် အချက်များ
နေ့စဥ် အတန်အသင့် လေ့ကျင့်ခန်းလုပ်ပါ။ စိတ်ဖိစီးမှုတွေကို ဖြေလျော့စေပြီး အိပ်ရာမဝင်ခင် ပေါ့ပေါ့ပါးပါး အကြောဆန့်ခြင်း ယောဂကျင့်ခြင်းက ညတွေမှာ နှစ်နှစ်ခြိုက်ခြိုက် အိပ်ပျော်စေပြီး ပြန်မနိုးလာစေဖို့ ကူညီပေးနိုင်ပါတယ်။
နေ့ဘက်တွေမှာ မအိပ်ပါနဲ့။ ညဘက်ကောင်းစွာ မအိပ်ရလို့ နေ့ဘက်အိပ်ပီး အိပ်ချိန်ကိုပြန်ဖြည့်တာက တကယ်မထိရောက်ပါဘူး။ နေ့ဘက်ပိုအိပ်လိုက်တာနဲ့ ခန္ခာကိုယ်အတွက် အိပ်ချိန်လုံလောက်သွားတယ်လို့ မဆိုနိုင်ပါဘူး။ အိပ်ချိန် အလွန်အကျွံဖြစ်ပြီး ညဘက်တွေမှာ ပြန်နိုးလာနိုင်ပါတယ်။
စိတ်ကြွဆေးများနှင့် အရက်ကို ရှောင်ပါ။ အိပ်ရာမဝင်ခင် အရက်၊ ကော်ဖီ၊ ဆေးလိပ်၊ vape သောက်ခြင်းတို့ကို ရှောင်ပါ။ ကဖိန်းဓာတ်နှင့် အရက်သည် ရေဓာတ်ခန်းခြောက်စေပြီး အိပ်စက်မှုစက်ဝန်းကို အနှောင့်အယှက်ပေးနိုင်ပါတယ်။
ဆီးသွားချင်လို့ နိုးလာတာမှ ရှောင်ကျဉ်ရန် ညရောက်တာနဲ့ အရည်လျှော့သောက်ပါ။
အိပ်ခန်းကို ညအိပ်မီး မှိန်မှိန်လောက်သာ ဖွင့်ထားပြီး အမှောင်ထားပါ။ ဖုန်းကို အသံပိတ်ထားပါ။
တစ်ရေးနိုးလာပြီဆိုရင်တော့-
စိတ်ကို တည်ငြိမ်စေပြီး ခန္ဓာကိုယ်ကို ပြေလျော့စေဖို့အတွက် အသက်ရှူလေ့ကျင့်ခန်း (deep breath) လုပ်ပါ။
နိုးလာရင် ဘာမှမတွေးမိအောင် ကြိုးစားပါ။ တရားမှတ်ပြီး စိတ်ကို ငြိမ်သက်အောင် ထားပါ။ သို့မဟုတ် နူးညံ့သော သီချင်းတစ်ပုဒ်၊ audio စာအုပ်တစ်အုပ်ကို နားထောင်ပါ။
တော်တော်နဲ့ ပြန်အိပ်မပျော်ပါက အိပ်ရာထဲမှာပဲ နေပြီး ပြန်အိပ်ဖို့ ကြိုးစားနေတာကို ရပ်လိုက်ပါ။ မိနစ် (20) အတွင်း ပြန်မအိပ်နိုင်ရင် အိပ်ရာမှထလိုက်တာ အကောင်းဆုံးပါပဲ။ ဆိုဖာ (သို့) ထိုင်ခုံမှာ သွားထိုင်ပါ။ မီးမဖွင့်ပါနဲ့၊ ညအိပ်မီးနဲ့ပဲ ဆက်နေပြီး ချည်ထိုးခြင်း၊ ရုပ်ရှင်ကြည့်ခြင်း၊ စာဖတ်ခြင်းတို့ ခဏလုပ်ပြီး တစ်ဖန် ငိုက်မျဉ်းလာတော့မှ အိပ်ရာသို့ ပြန်သွားပါ။ Social Media မသုံးပါနဲ့။
အိပ်ပျော်နေရင်းနဲ့မှ နိုးလာပြီး ပြန်အိပ်လို့ မရတော့တာလောက် ခက်ခဲတာမရှိပါဘူး။
စိတ်ဖိစီးမှုတွေနဲ့ အိပ်ရေးပျက်တာ များလာရင် စိတ်ကျန်းမာရေးကိုပါ ထိခိုက်နိုင်တာမို့ ညဘက်ကောင်းကောင်း အိပ်ပျော်စေဖို့ အထူးဂရုစိုက်သင့်ပါတယ်။